ណាត់ប្រពន្ធឲ្យមកជួបតែប្រពន្ធមិនមកយកកាំបិតផ្គាក់កាប់ប្រពន្ធខណៈកំពុងជិះម៉ូតូបណ្ដាលស្លាប់យ៉ាងសង្វែក
19-April-2018 | ដោយ ពលមនសិការ
កណ្ដាល ៖ ជនសង្ស័យម្នាក់បានយកកាំបិតផ្គាក់កាប់ទៅលើនារីម្នាក់ជាប្រពន្ធដែលបានបែកគ្នាអស់រយៈពេលប្រមាណជាង២ខែចំ.ក ខណៈដែលនារីរងគ្រោះកំពុងជិះម៉ូតូ បណ្ដាលឲ្យធ្លាក់ពីលើម៉ូតូស្លាប់ភ្លាមៗ។ ករណីឃាតកម្មខាងលើនេះបានកើតឡើងនៅវេលាម៉ោង២និង១៥នាទី ថ្ងៃទី១៩ ខែមេសា ឆ្នាំ២០១៨ ត្រង់ចំណុចអនុវិទ្យាល័យកំពង់ចម្លង ស្ថិតក្នុងភូមិកំពង់ចម្លង ឃុំព្រែកទម្លាប់ ស្រុកលើកដែក ខេត្ដកណ្ដាល ។
មន្ដ្រីនគរបាលស្រុកលើកដែកបានឲ្យដឹងថា នារីរងគ្រោះឈ្មោះ ទន់ ស្រីណយ អាយុប្រមាណ១៨ឆ្នាំ ជនជាតិខ្មែរ មានទីលំនៅភូមិស្ពានដែក ឃុំព្រែកទម្លាប់ ស្រុកលើកដែក ខេត្ដកណ្ដាល។ ចំណែកជនសង្ស័យឈ្មោះ រ៉ា ឆៃរ៉ាត់ ភេទប្រុស អាយុប្រមាណ២៣ឆ្នាំ មានទីលំនៅភូមិអំពិលទឹក ឃុំកំពង់ភ្នំ ស្រុកលើកដែក ខេត្ដកណ្ដាល ។
ប្រភពដដែលបន្ដថា ជនសង្ស័យនិងនារីរងគ្រោះបានបែកបាក់លែងលះគ្នាអស់ប្រមាណជាង២ខែមកហើយ ដោយសារជនសង្ស័យជាប្ដីវាយដំធ្វើបាបទៅលើនារីរងគ្រោះខ្លាំងពេក ។ លុះមកដល់ថ្ងៃទី១៩ ខែមេសា ឆ្នាំ២០១៨ ជនសង្ស័យបានឲ្យនារីរងគ្រោះមកជួបគ្នា តែនារីរងគ្រោះមិនទៅជួបនោះទេ មកដល់វេលាម៉ោង២និង១៥នាទី ស្រាប់តែជនសង្ស័យបានយកកាំបិតផ្គាក់មកកាប់ទៅលើនារីរងគ្រោះចំ.កខណៈនារីរងគ្រោះកំពុងជិះម៉ូតូ បណ្ដាលឲ្យធ្លាក់ពីលើម៉ូតូស្លាប់ក្នុងថ្លុកឈាមយ៉ាងរន្ធត់តែម្ដង។ ក្រោយពីធ្វើសកម្មភាពរួច ជនសង្ស័យបានរត់គេចខ្លួនបាត់ស្រមោល ។ ចំពោះករណីខាងលើនេះ សមត្ថកិច្ចកំពុងធ្វើការឡោមព័ន្ធចាប់ជនសង្ស័យ ខណៈជនសង្ស័យបានព្យាយាមលោតទឹកសម្លាប់ខ្លួនលើស្ពានត្សឹបាសា ហៅស្ពានអ្នកលឿង៕
ចំនួនអ្នកទស្សនា
- ថ្ងៃនេះ1121
- ម្សិលមិញ10851
- សប្តាហ៍នេះ67641
- ខែនេះ182791
- ឆ្នាំនេះ182791
- សរុប20625247